هذا هو التحليل النفسي- الاجتماعي لهادوك اللي مصدعينا ب” الله يعطينا شي سويدية”

شي مرات كنكون كنضرب دورة فالفايس بوك… كنتسركل من باج لباج …تاكانلقا راسي فاص ا فاص مع شي كومونتير من هاد النوعية “الهربة لمن استطاع” “السويد تنادي” “الله يعطينا شي سويدية ” و من باب الفضول كندخل لبروفيل لي كاتب هادشي و كنحاول نجمع عليه مجموعة د المعلومات كتخليني نتخايل الشخصية ديالو كي دايرة (فين كابر، شحال السالير ديالو، فين قاري ، واش شي بوكوص و لا كوفرة فالغايس، اشمن لغة كيتقن) و مجموعة د المعلومات من خلال التصاور و داكشي لي كايبارطاجي… و بعد مدة من الاستقصاء و التقصي على واحد العينة د هاد الناس لي كيكتبو هادشي un échantillon représentatif … خرجت بالخلاصات التالية:
-هاد النوع د الباشار 100 فلميا منو عمرو فات طنجة و 90 فلميا ماعندوش اصلا باسبور و ديك 10 فلميا لي عندها الباسبور من المستحيل تلقا فايتة مطبوعة فيه فيزا شنغن. هادشي ان دل على شيء فانه يدل على ان هاد السيد ماعمرو مشا لاوروبا و ماعمرو شاف السويد و ماعمرو هضر مع شي سويديه و الفكرة ديالو كونها غا من الهضرة لي كيسمع و و من الماتشات د الكورة و شي تصيورات لقاهم فالفايسبوك! ملخر “عا سامع و صافي” .
-الاغلبية الساحقة ماعندهمش صالير،:طلبة، شومورات، ولي عندو فيهم صالير فهو غالبا مافايتش 5000 درهم و حتى الا فاتها شي شوية فهو مع كثرة المصاريف كتلقاه ماكايدوقش منو تا 1000 درهم صحيحة. يعني حازق او معدم ! فقير او فقير جدا. يعني كاع لا بغا يمشي للسويد فاطار السياحة و داكشي راه مايعطوهش فيزا
-فئة مهمة دهاد الناس لا تتقن اللغات ! كايسحابلو راسو راه كايهضر بالفرونسي هو راه غا كايتخايل لا طليتي على التعاليق ديالو بالفرونسي كتلقاه لا تتجاوز كلمات معدودات و داكشي د ميكي جولي ميكي ! و لونكَلي ديال “هاي هاواريو … ” يعني من لخر هاحنا سيفطناك للسويد و دبرنا ليك فكونطرا و سهل عليك الله و وصلتي تما ! باش غاتهضر مع السويدية ؟ كيفاش غاتفسر ليها راك باغي تزوج بيها و تحسنو النسل ؟
-الاغلبية كيسحابلو بيلا الرجل الابيض عامة و السويدي خاصة “بارد” “عاجز جنسيا” عن ارضاء شريكته ..و كايسحابو فاش غايوصل للسويد غايتلاحو عليه السويديات كيطلبو و يزاوكو و يعاورطو و يذبحو ثور بيض سويدي “ها العار لاما عتقنا ” واش ا صاحبي مامركتيش ؟ هاداك وجهك مصنوع من اللحم و لا مضروب بالسانطوفير ؟ واش نتا كابر حسن من السويدي لي مطلع صحتو بالتغذية السليمة و الفيطامينات و الفرماج موجود مابغاه بوبي و الرياضة ؟ واش عندك التربية الجنسية لي عندو؟ واش السويد فيها بنادم عندو 30 عام فعمرو و ماعمرو شاف شي ط**** كي داير؟ ؟ ؟
-ملاحظة اخرى اثارت انتباهي هي اللون ديال القفا د هاد الفئة و لي كتلقاه اسمر غامق يميل الى الكحولة و هادا ان دل على شيء فانه يدل على قلة الغسيل و الدوش! وا هانتا مشيتي للسويد ا سيدي و ضبرتي على هاد السويدية و دوزتي النهار كامل و نتا خدام و جيتي فالليل خرgتي بيجامتك و تخشيتي حداها فالفراش بضفارك مسوسين واش ماتحشمش تعمي لديك الدريرية عويناتها ؟ واش ماشي حشومة يبقاو يقولو علينا السويديات المغاربة معفونين ماكايغسلو قزازبهم عا مرة فالسيمانة؟
-مع احترامي للنساء ربات البيوت ! كتلقا 99 فلميا د هاد الفئة لي بغاو السويد مو ربة بيت و موالف كيدخل مع الطناش كيلقا الغدا موجود و فالليل كتخلي ليه الواليدة حقو د العشا و مو كتصبنليه دوك الكراصن المدودين ديالو و هو كينوض كيحك قلاويه و كايعيط على مو و لا ختو “وااا فيناهوا داك الكرصون القهوي المخطط بالفانيدي”””” كلاه الدود يا ولد القح***! و دابا نديروك مشيتي و لقيتي واااااحد السويدية… كيغادير لها القضية د العكز لي فيك؟ كي غادير معاها لاقاتلك نوض صبن كراصنك راه بداو كيطلعو ليها معا الحيوط كي سلاحف النينجا؟كي غادير لا قاتلك ليوما نوبتك ا حبيية توجد العشا و غدا نوبتي ؟ باش غاتحس فاش غاتكون جالس كتلعب بقليواتك قدام التلفازة و تجي تحط ليك الاسبيراتور قدامك و تقوليك ” هوني بليز نوض طرف معاك الدار”!!
-من خلال واحد الدراسة احصائية على اماكن السكنى ديال هاد الفئة كنلاحضو واحد التجمع سكاني رهيب و الله رهيب فالكاريانات و الاحياء الشعبية و الضواحي … يعني فاش ناخدو عينة د 10 د هاد الناس و نبغيو نشوفو شحال من واحد فيهم ساكن فبير قاسم مثلا و لا ف تاركة مثلا و لا ف كاليفورنيا د كازا مثلا يستحيييييل تلقا واحد من دوك العشرة ساكن فشي واحد من هاد الاحياء . علاش؟ ربما ربما حيت دوك الناس دوك الاحياء ماعارفينش السويد !؟ ربما ماعمرهم شافو السويديات ؟ يقدرو يكونو كاع كلهم لوبيات ماعندهمش مع البنات اصلا …. ماعرفتي ! انا نحلف و نتوما تحلفو و التقليد على كوود.

مهم حنا غير حاولنا نديرو واحد المقاربة سوسيو جتماعية لهاد الفئة د “السويد” هادشي فاطار المستملحات ! قاليك “رحم الله عبدا عرف قدر نفسه” راه السويديات لا ساقو ليكم الخبار كتفونطازميو عليهم يقدرو يقطعو بزازلهم و تراميهم و يفورو عليهم و يعطيوهم لاطفال اثيوبيا لي قاتلاهم المجاعة و مايعطوهمش ليكم.

سهام إباروري- كود